I no know where to start from...Everything about this country and her people don tire me..

Caveat: I be the igwe of this thread..if you no know wetin to talk, carry your wahala dey go, make I no change am for you..

For the past two days I never use eye see light...This country suppose be giant of Africa, yet her people dey like slaves...No light to iron clothes, no light to charge phone, no light to do anything for this country... At least if light dey, I go watch TV, I go the chat with phone, connect with people so as to forget my plenty sorrows....but no, them no go gree do anything..I still never know why!!!

Me 2

Person go finish school, after the struggle to go night class everyday, spend better money for seminar and project..struggle graduate with 2.1....spend one long year dey serve him country....yet he no go see job after everything..na this kind life person suppose to dey live?

Some of us don even vex do MSC join...yet no level...
E come be like say we just dey fool ourselves for this country..
some mumu go come here dey shout PDP and APC yet money no dey enter their pocket..them just dey here dey form political analyst..no level..

All the better jobs wey dey this country na for big men children.. if your papa no get money, the chance of you being anything/anybody eventually slim pass broom..

Which kind life be this??

as I dey here now...my temper dey hot..I dey vex!!

Source of income no dey anywhere..some fools go save 'become an entrepreneur' shey na my kidney go give me capital to take set something up? Abi dem go gree give person loan?

Those foools dey deceive themselves say them dey empower youths...which youths? why we like to dey deceive ourselves? shebi na because Nigerians too quiet na him make dem think say we be mumu?

Boys vex enter street begin play bet9ja, baba ijebu and all whatnot....yet, no level...Games dey cut back to back.. if arsenal no draw, Chelsea go lose...which kind betting boys no try...under 1.5, under 11.5, over? goal.goal..name it..

sowtee we enter virtual betting...losing back to back...Every game was a lost..
see graduates dey play virtual at least to get 1k take recharge phone...

na d kind life human being suppose dey llive?

.....


Guy take am easy...Nigeria tire all of us

which one I go talk leave the other...Almost all the boys wey dey area don dey pass road enter obodo oyibo..because the country don tire them..
Them no even dey care about us..One say he dey fight corruption, na corruption I go chop abi na corruption wan give me better job?
As dem dey recover the money..dem dey keep am for who? their children?

which hope poor man pikin get for this country? I hear say saraki papa na senate president that year...now, saraki na senate president..probably in 10years time saraki pickin go be Senate president...he fit dey one side dey chill while dem dey groom am...poor people children go dey hear dey shout pdp4life and Apctilldeath..

No be crase we dey use style dey crase so??

As you see me so..I weak..

Boys don dey enter street, some don dey turn to tout, others dey run Yahoo. yahoo, internet fraud , e get a dozen other appellation.. But I no go blame them..I no fit. No be their fault say this country be like this...no be their fault say Some people chose to suck us dry, no be their fault say them wan make ends meet..

Some don turn tout...Few days ago, for one state for this country, one tout celebrate his 1billion naira..tout wey no finish primary six get 1billion and the money still dey increase..you no even get reach 100k ( I just talk 100k to give us level)...some graduates no even get reach 10k for account..

yet, those senators way una dey worship, most of them no go school o....I con dey ask myself how manage? why this country be like this? why this country like force and threat? why dem no dey respect gentle man?

okon never chop, he go buy dog...wetin u say make d dog chop? grass? abi you wan turn your dog to goat?

young man never find him leg..he go dey find girlfriend..How e wan take happen? Your babe go ask you for money, you go dey preach sermon...common recharge card you no go fit send give girl wey u claim say you love...why she no go cheat on you? if na you be she, you no go cheat on your self? All these dey happen because na mad people full this country...Some of us, our only saving grace na our fine face else na masturbate we for just dey masturbate upadan dey fool our selves..especially this weather wey no funny..

I just dey vex badly... I no even fit watch match this night...where I wan see light?

Wetin never tire me for this country? Abi na the churches?

I go one church some Sundays ago the so called man of God just dey prophesy rubbish give me...wetin dem dey find na clue if you give them clue dem go begin use sense dey fool themselves...

when I dey ss3 one man wey call himself pastor say 'The lord is telling me, The lord just whispered it to my ears, the Lord said I should tell you that before you celebrate your 20th birthday you would have your own personal car' People for the church just dey shout "praise d lord"...To claim prophesy by faith, I carry my money wey I suppose use chop...carry am go give pastor...how many years I dey now? no be from one keke to another keke?

mycheeew..

everybody dey find money...The small one wey I get u expect me to carry am go give pastor? who he help?

make I go sleep jooor...that na d only thing wey dey give some of us joy..

Baba God no dey charge us money to sleep.. If dem say make I pay for this sleep..wahala don come cos I no get money to pay...

make una continue to dey shout PDP and APC...na una sabi

When person suppose comot.for him papa house? 25? 20? 30?

people of these age grade still dey house cos nothing to do...soon dem go start to drink, smoke, weed,....all because of frustration...

when you go marry? abi u forget say one day you go start your own family? how that one wan take happen when u never even see food chop?

make I ask one question....how e wan take better?
make we forget all these e go better mantra...make we ask how e wan take better? how? wetin wan change between now and 2years time? same govt, same economic team? same politicians, same everything...same everything....

I no even know wetin I dey talk again...

my vex don too much

DDeliverer:
as I dey here now...my temper dey hot..I dey vex!!

Source of income no dey anywhere..some fools go save 'become an entrepreneur' shey na my kidney go give me capital to take set something up? Abi dem go gree give person loan?

Those foools dey deceive themselves say them dey empower youths...which youths? why we like to dey deceive ourselves? shebi na because Nigerians too quiet na him make dem think say we be mumu?

Boys vex enter street begin play bet9ja, baba ijebu and all whatnot....yet, no level...Games dey cut back to back.. if arsenal no draw, Chelsea go lose...which kind betting boys no try...under 1.5, under 11.5, over? goal.goal..name it..

sowtee we enter virtual betting...losing back to back...Every game was a lost..
see graduates dey play virtual at least to get 1k take recharge phone...

na d kind life human being suppose dey llive?

guy laff wan tear my belle

Thoughts of a reasonable person,common sense is not common you go make am but e go take time.

jking001:
Thoughts of a reasonable person,common sense is not common you go make am but e go take time.

Na d tin wey op dey talk be dis. Him don say make we leave all ds e go better mata, instead we need to ask how and when that beta wan come. Now u dey talk say him go make am only be say e go take time so make I ask u, how him go make am and when? Abi DDeliverer...am I in order?

adediranta:

guy laff wan tear my belle

this na laffing matter?
na who don chop dey laff sha....carry on!

freeze001:


Na d tin wey op dey talk be dis. Him don say make we leave all ds e go better mata, instead we need to ask how and when that beta wan come. Now u dey talk say him go make am only be say e go take time so make I ask u, how him go make am and when? Abi DDeliverer...am I in order?

my dear, you just speak my mind....'e go better; e go better' when and how??
I no wan dey hear anything about the future...make e start now...

how long shall these nonsense continue..
just imagine say I never see light for almost 1week now...

I no even dey benefit anything from this country...

DDeliverer:
Person go finish school, after the struggle to go night class everyday, spend better money for seminar and project..struggle graduate with 2.1....spend one long year dey serve him country....yet he no go see job after everything..na this kind life person suppose to dey leave?

Some of us don even vex do MSC join...yet no level...
E come be like say we just dey fool ourselves for this country..
some mumu go come here dey shout PDP and APC yet money no dey enter their pocket..them just dey here dey form political analyst..no level..

All the better jobs wey dey this country na for big men children.. if your papa no get money, the chance of you being anything/anybody eventually slim pass broom..

Which kind life be this??

[img]http://4.bp..com/-Ir5DN_7mwzw/UngEwcH7ppI/AAAAAAAAOpg/cTPq2iBdjWg/s1600/ti.gif[/img]

Golden thread!

The most hilarious thread I've seen in a while..

Funny and thought-provoking at the same time

PDP..APC nonsense 24-7 yet all man dey "H" for street

Baba...na to leave that country sure pass... No be say e no dey possible to make am ooo but the chances
slim gaan

OmoAjowa7:
PDP..APC nonsense 24-7 yet all man dey "H" for street

Baba...na to leave that country sure pass... No be say e no dey possible to make am ooo but the chances
slim gaan

Baba, for my area..like 70% of the boys don move..Some dey Italy, some Spain ..as in..everything about this country just tire me...

I wish say I dey even see light sef....I for dey bear am..

Nothing wey I go look/ hold wey dey make me proud say I be Nigerian..

DDeliverer:


Baba, for my area..like 70% of the boys don move..Some dey Italy, some Spain ..as in..everything about this country just tire me...

I wish say I dey even see light sef....I for dey bear am..

Nothing wey I go look/ hold wey dey make me proud say I be Nigerian..

I even hear say boys dey move go Ghana...The same things wey our pops set been complain about that
year na him we sef still dey complain about...One otondo go enter studio go dey record "Naija go better"

All man na upcoming artiste these days..Artiste gaan don plenty pass fans

Anyway, people like us been see the signs that year before we comot...

Save bar comot that place...

Even the small money wey you dey try save up gaan, one Olosh still dey think of how to scam you

May i go do money ritual last












I no no....

If Buhari go fit just vex give us stable electricity for this country with the remaining years wey he get as president...Nigerians no go ever forget am...yet, he say na corruption he wan fight...wetin that one mean?

Abi them curse this country with darkness?

Oga graduate decide to humble himself go learning barbing....no light to encourage the guy..

he say make he learn tailoring....no light to encourage am..

wetin u say make he do? make he begin push wheel barrow? why he bother to even go school in the first place?
wetin our senators even dey do sef?? which special work dem dey do? which kind nonsense laws dem dey make? wey their salaries go high like that yet men dey street dey hungry...

why we dey foool oursefs for this country??

dollyjuke:
May i go do money ritual last



I no no....

Lmao...hahaha.
All those things dey work?
na 9ja home video we dey watch am..

Sit down there poverty never hook you....

OmoAjowa7:


I even hear say boys dey move go Ghana...The same things wey our pops set been complain about that
year na him we sef still dey complain about...One otondo go enter studio go dey record "Naija go better"

All man na upcoming artiste these days..Artiste gaan don plenty pass fans

Anyway, people like us been see the signs that year before we comot...

Save bar comot that place...

Even the small money wey you dey try save up gaan, one Olosh still dey think of how to scam you

hahahahaha..

lmao...

nawa o

This is why Committing sucide is a crime in Nigeria.. We all must share the miseries.. The larger we are, the lesser the pain..

Op when you become determined to be successful as much as you cant do without the air you breath, you will be succesful. There is always a way. Find it!

My brother. If I tel u say u and I dey the same shoes, u no go believe am. I read so tey... Since 2014 wey I finish service... No way. ... Some days.. I go just vex take trams sleep go. Maybe if I wake up, things go change. Go interviews.,reach last stage before u know regret mail. E get one mumu one wey I go them say na customer service recruiting firm..imagine, me wey dey find work, then dey tell me to pay 25k for training, say employment na guarantee. So, I get 25k and I dey send call me back to my paddy wey thanks to him popsi wey get level, he dey work for ministry, to remind am to remember me if any openings dey?


My brother, I don sign.. Na lappy and connection I need. Hustle some e money. Move out.

Abeg, anybody with sure body ip... Holla biko. Some of my friends for fb go dey hustle for likes unto pictures wey them post. I go just dey vex. I no blame them, them no get problem at all.

Hilarious! The truth in simple and plain language. Me self lock myself for house dey sleep since today, that na why I no fit sleep again.

My paddy say na club him want make we go this night, I don tell am say I get running stomach.
For where, stomach wey never see better food chop, wetin wan run inside am again?

coolestdude01:
My brother. If I tel u say u and I dey the same shoes, u no go believe am. I read so tey... Since 2014 wey I finish service... No way. ... Some days.. I go just vex take trams sleep go. Maybe if I wake up, things go change. Go interviews.,reach last stage before u know regret mail. E get one mumu one wey I go them say na customer service recruiting firm..imagine, me wey dey find work, then dey tell me to pay 25k for training, say employment na guarantee. So, I get 25k and I dey send call me back to my paddy wey thanks to him popsi wey get level, he dey work for ministry, to remind am to remember me if any openings dey?


My brother, I don sign.. Na lappy and connection I need. Hustle some e money. Move out.

Abeg, anybody with sure body ip... Holla biko. Some of my friends for fb go dey hustle for likes unto pictures wey them post. I go just dey vex. I no blame them, them no get problem at all.

[img]http://www.abload.de/img/laughstupid45kad.gif[/img]

ThundrCork:
Op when you become determined to be successful as much as you cant do without the air you breath, you will be succesful. There is always a way. Find it!

For where!

Na so all those motivational speakers dey use us sell their books dey hammer! We self tire to dey buy their books, na so-so mouth dem dey make, nothing tangible to offer.

No be last 2 yrs that guy wey write Rich dad, poor dad broke sotey him declare bankruptcy?

Abeg leave matter for Mathias.