EARLY MO MO

Early mo mo, mumsi don wake us to come pray.
Time to cast and bind every bad demon wey dey wait us for road.
Time to pray make God sugar our morning tea and banga our afternoon starch

Early mo mo, neighborhood cock don begin im morning crow.
Poor guy wey no know say na im wife we use cook rice yesterday.
Poor guy wey no know say we don plan im death for evening.

Early mo mo, pounding sound don dey ring for our ear.
Evidence say Ramadan season don show.
A season of fasting and piety.
Time wey I fit tear Lateef slap without fear of revenge.
Time wey Iya Tade house dey scent well for evening time.

Early mo mo, aunty Ramota prayer don start.
Prayer make God inject her boyfriend with the spirit of proposal.
Prayer make God burn every devil of bachelorhood wey dey follow uncle for back.
Unto say uncle don slack too much and her body sef get clock.

Early mo mo, papa Edafe don begin swear.
Say make e no better for all the police officers.
Unto say them no gree come at the time wey 'chairmen' dey rob for im compound.
Say make e no beta for govament pipu.
Unto say e don reach 3 years wey im pension allawi show last
Say make thunder fire Onome yansh anywhere she dey.
Unto say she carry Edafe, im pikin, moni run and break im heart join.

Early mo mo, Bashorun don begin fire prayer down.
Say every eye wey dey read the words no go blind.
Say make God continue to bless mama Atinuke at all seasons.
Say make Jesus nor forget to carry us anytime wey im show.
Unto say na wetin we dey wait for since.
Because this world and everitin inside na vanity.

Wetin you dey do with your early mo mo o?
#BASHORUN

Okontas.com