PRAISE FATHER, SON AND HOL AM DERE!

(Runs towards a sitting brother)

Abeg who you dey praise wey you dey siddon for dia.
Because I nor sure say you know who you dey praise.

The Agbada-gburu wey 'Buratai-ze' your enemies.

The Alagbada Ina wey make NEPA to on light ontop your mata.

You sef remember na!
How that exam and lecturer wan use u do suya for mallam shop.
How that poverty take you shine for front of everybody
So tey people wey poor sef dey use you take thank God say their own case different.
So tey no rat gree show face inside ya room unto say na shine your pot dey shine every time.
So tey the local dog for neighborhood dey go hustle bone, come drop for your doormot say make una two share am because say your condition critical.

Abi you nor remember?

How those nurses don begin call you chief tenant for the hospital.
How the 100 level students don begin call you Grandfather for class.
How the buka people don begin call you 'chief-plate washer'
How everyone for church don see you as commander in chief of prayer warriors
Unto say your case get as e be, and you fight better battle to break loose.

So now you don become big man na.
Dey swing; one step right, one step left; when better praise dey go one.
Dey raise hand mid-way when them say make you wave for God.

"Thunder fi..."
Bia, nor let make I mistalk for hia o.

Just stand and begin to do the needful.
Dey komole when better Alujo Jesu (dance for Jesu) hit the floor.
Dey speak everything wey Baba God do for you wen time reach.

Unto say..
Unto say....
Na person wey praise na im God dey raise.
Church don close.
#BASHORUN

Okontas.com