By Izunna Okafor.

Ndị obodo Nando n'okpuru ọchịchị Anambra East ewerela otu olu kwekọrịta ma eguzobe maazị Obinna Emeneka ka ọ bụrụ onye nnọchi anya ọgbọ nta nkwàdo Anambra 'East' na 'West' n'ụlọ nnọchite anya etiti n'ahọ 2019.
Nguzobe a bụ nke weere ọnọdụ na mmemme pụrụ iche a chịkọbara iji nabata ta bụ nwa amadi, bụkwa onye na-anọchite anya ọgbọ nta nkwado Anambra 'East' n'ụlọ ọgbakọ omebe iwu steeti Anambra.
Oke mmemme ahụ bụ nke weere ọnọdụ na be nwa amadi ahụ ma bụrụkwa nke dọtara imirikiti ụmụafọ obodo ahụ nke gụnyere ndị Ojiana Nando, ndị Irunaanọ Nando, òtù ụmụwaanyị, ndị ntorobịa, tinyere ọtụtụ ndị ọzọ dị iche iche e ki okwu ha agba izù, bụ ndi juputara ebe ahụ gbịm n'ọnụ, iji wee gosipụta ka obi dị ha banyere ha bụ nguzobe.
N'okwu ha na mmemme ahụ, ndị ndu obodo, nke gụnyere maazị Ifeanyị Ọgụejiọfọ, maazị Ajamma Donatus na onye ndu ndị ntorobịa n'obodo ahụ, bụ maazị Chidozie Ameke, kelere, too ma kwupùrú maazị Emeneka maka ọrụ ọma dị iche iche ọ rụpụtagoro, ọbụnadị dịka onye nnọchi anya ha n'ụlọ ọgbakọ omebe iwu steeti Anambra, ọ kachasị n'iwelatara ha ọrụ mmepe dị iche iche, ịkwadò ndị ntorobịa, nakwa ikwuchite ọnụ ndị mpaghara Ọmambala n'ụlọ ọgbakọ ahụ. Ha wee kọwaa na nke ahụ gosiri nnọọ na ya bụ nwa amadi zuru ka e mee, ọbụnadị n'ịnọchite anya ha n'ụlọ nnọchi anya etiti.
Na mbụ n'okwu ya, onyeisi oche Ojiana Nando, bụ Chiifu Matthew Esedo, bụ onye kwụpụtara maka nkwekọrịta na nguzobe ahụ, weere nnọọ oge wee kpọpụtasịa ọtụtụ ihe dị iche iche ya bụ onye omebe iwu dọtaara ndị ọgbọ nta nkwado ya, ma sị na nke ahụ bụ ụdị a hụbeghị kemgbe, bụzị nke mere ha jiri sị ka ọ gaara ha ụlọ nnọchi etiti.
Na nzaghachi, isi a hụrụ kwaba ya bụ okpu, bụ maazị Emeneka gosipụtara obi ụtọ ya na ndị nke ya na-enwe ọñụ n'isi ya maka ọrụ ya n'ụlọ omebe iwu steeti Anambra.O kwekwara nkwa na dịka ha guzobeworo ya maka ọkwa ahụ dị elu, na ọ ga-agazị ịkpọtụrụ ndị dị iche iche o kwesiri ịkpọtụrụ na mpaghara Anambra 'East' na 'West', ma kwupụtakwa ezi olile anya o nwere na ọ ga-aga nke ọma.