The Three R’s of Waste Management


Pollution when happen because we throwey dirty anyhow fit cause problem for our country o. Some of
the problem na flood, disease, poverty, ehen. I know say you go like ask how this dirty fit cause all this
problem. Well sha read this story so that you go know how dirty dey cause this problem, how we go
take control our dirty well if we use three ways and how we go come take rich more and get better
health with good way to control dirty. The three better ways when we fit take control our dirty start
with letter R.

[img]https://1.bp..com/-Ohm9ov8z4fk/XR55k5ztZJI/AAAAAAAAEo8/V281vuMN8Zs6_WoxF69qky1TWoH83uuAACLcBGAs/s1600/IMG_20180620_102049.jpg[/img]

When we throwey things like plastic bags, bottles anyhow, they fit block our gutter and that thing fit
make area flood especially when rain dey fall. Remember say mosquito dey lay their egg on top stagnant
water so if our gutter block, malaria go come rampant for that area o. The way when we take dey
throwey food when remain fit bring sickness like Lassa fever, paragonimiasis o. This one mean say when
we dey throwey dirty anyhow whether na organic or inorganic dirty, we dey carry bad thing come meet
ourselves then still meet other people when dey our environment. Ask yourself this question: wetin I fit
do to manage my dirty and throwey the corecct way? This question go carry us go the first R of the three
better ways to throwey dirty.

Reduce

Watin be Reduce? How I fit take reduce? The first step na self-control. You go see sweet food for market
and you get money to buy am. I no stop you to buy am o but buy only the one when you fit finish so that
you no go throwey the one when turn to dirty. See another example; you won go market and you know
say you go buy many things. Why you no just carry your own cellophane go market so that them no go
give you another one? If you continue to collect new cellophane everytime, na dirty you dey produce. By
now sha thank God say you don dey know why we need to reduce our dirty.

To reduce our dirty fit make you rich o. When you reduce watin you buy, you fit save more money.
Continue to reduce your dirty.

Reuse

Which one be Reuse again na? This one make sense well well o because e go show say you nor only dey
creative but you still like to save our environment. E good make we define dirty as something when we
never get use for. The time when dirty don get use, no be dirty again. What if we use all those
disposable cups wey them dey share for party take dey keep our pencil and biro on top our table? What
if we use plastics bottle as funnel to pour fuel for our generator? We fit even use them keep some of our
cooking ingredients sef but make sure say na the one when you use by yourself nai you dey use o. For
Animal and Environmental Biology building inside uniport, we use plastic bottles and their caps take
build one fine walkway. When you dey reuse, you go dey think so the more you reuse, the more you go
know book.

To reuse dirty fit help you to save money because when you reuse something, you nor go come spend
money to buy am again.

Recycle

Ehen. This word popular well well. People dey mistake “Recycle” and “Reuse” well well but them no be
the same o. To recycle no be to reuse but na industrial process when dey convert something when be
dirty to another new thing. For example first, We fit collect book when them throwey then recycle am
turn to newspaper or toilet roll. What about plastic bottles? We fit recycle am turn plastic buckets and
other plastic things. To recycling nai be the best R of of all the R because dirty fit come out as something
new. When we recycle, our natural resources go rest small.

To recycle fit make you rich too. For inside Nigeria, place wey them take dey recycle never plenty. You fit
open one, collect or buy the dirty wey you want from people then you fit sell the one wey you don
recycle. To recycle no go only make you rich, E go make other people rich then still make our
environment clean.

You see? With the three better ways to control dirty, we fit become healthy, rich and our society fit turn
to something when oyibo people dey call sustainable. See that dirty when you wan throwey so? Hold
am, wait till you see trash can before you throwey am. Na me and you go start am then people go
follow.

How you check the story?

Written By:
Elijah Rona

It's a good read.